దానిమ్మ ప్రయోజనాలు మరియు దుష్ప్రభావాలు - Benefits and Side effects of Pomegranate in Telugu

రక్త నాళాలు, చర్మం మరియు ఎముకల అభివృద్ధి మరియు నిర్వహణకు విటమిన్ సి చాలా ముఖ్యం. దానిమ్మ ఈ విటమిన్ యొక్క సహజ మూలం/వనరు. దానిమ్మ రసం మానవ శరీరానికి రోజువారీ అవసరమయ్యే విటమిన్ సిలో 40% కంటే ఎక్కువ భాగాన్ని అందిస్తుంది. కానీ ఇది పాశ్చరైజేషన్ సమయంలో విచ్ఛిన్నమైపోతుంది (తొలగిపోతుంది), కాబట్టి ఉత్తమమైన పోషక ప్రయోజనాలను పొందడానికి ఇంట్లో తయారు చేసిన లేదా తాజా దానిమ్మపండు రసాన్ని తీసుకోవడం మంచిది.

దీర్ఘకాలిక వాపు క్యాన్సర్, గుండె జబ్బులు, ఊబకాయం, టైప్ 2 మధుమేహం, మరియు అల్జీమర్స్ తో సహా అనేక తీవ్రమైన వ్యాధుల ముఖ్య కారణాలలో ఒకటి.

జీర్ణశయాంతర ప్రేగుల యొక్క వాపు పరిస్థితులను తగ్గించడంలో దానిమ్మపండు ప్రభావవంతంగా ఉంటుందని అధ్యయనాలు సూచిస్తున్నాయి. అదనంగా, దానిమ్మపండులో ఉండే ఎల్లాజిక్ ఆసిడ్ (ellagic acid) ఈ పండు యొక్క వాపు నిరోధక లక్షణాలకు బాధ్యత వహిస్తుందని ఈ అధ్యయనం నివేదించింది.

టైప్ 2 మధుమేహంతో బాధపడుతున్న 50 మందితో ఒక 12-వారాల అధ్యయనం నిర్వహించబడింది. ప్రతిరోజు ఒక నిర్దిష్ట మొత్తంలో దానిమ్మ రసం తీసుకోవడం వలన ఇంటర్లీకిన్ 6 మరియు ఇన్ఫలమేటరి మార్కర్ సిఆర్ పి(CRP) లను తగ్గించవచ్చని ఈ అధ్యయనం సూచించింది. మధుమేహ రోగులలో వాపు తగ్గించడానికి వారి ఆహార విధానంలో దానిమ్మను చేర్చవచ్చు.

ల్యాబ్ అధ్యయనాలు దానిమ్మపండులో ఉండే ప్యూనిసిక్ యాసిడ్ (punicic acid), కొన్ని రొమ్ము క్యాన్సర్ కణలుకు వ్యతిరేకంగా బలమైన వాపు నిరోధక ప్రభావాన్ని చూపిందని సూచిస్తున్నాయి.

(మరింత సమాచారం: ఇన్ఫలమేటరీ వ్యాధి)

శరీరంలోని రక్త చక్కెర స్థాయిలను తగ్గించడంలో దానిమ్మలు చాలా ప్రభావవంతమైనవి. మధుమేహం మరియు హైపర్ గ్లైసీమియా (hyperglycemia) తో బాధపడుతున్న రోగులపై ముఖ్యంగా దానిమ్మ చెట్టు పువ్వులు మరియు దానిమ్మ గింజలు ప్రభావవంతంగా ఉంటాయి. రక్త చక్కెర స్థాయిలను తగ్గించడం మరియు హైపోగ్లైసెమిక్ లక్షణాలలో దానిమ్మ సామర్థ్యాలను అర్థం చేసుకోవడానికి ప్రపంచవ్యాప్తంగా వైద్యులు దానిమ్మ గింజలు, పువ్వులు, సారాలు మరియు రసాలపై వివిధ అధ్యయనం చేస్తున్నారు.

దానిమ్మపండులోని కొన్ని సమ్మేళనాలు యాంటి డయాబెటిక్ చర్యలను కలిగి ఉన్నాయని పరిశోధనలు తెలుపుతున్నాయి. ఇంకా, దానిమ్మ రసంలో ప్రత్యేక యాంటీఆక్సిడెంట్ పోలీఫెనోల్స్ అయిన టానిన్లు మరియు అంథోసయనిన్లు ఉన్నట్లు గుర్తించారు, ఇవి  టైప్ 2 డయాబెటీస్ పరిస్థితులను నియంత్రించడానికి సహాయపడతాయి. కాబట్టి, దానిమ్మపండు యొక్క డయాబెటిక్ వ్యతిరేక చర్యలకు రుజువు ఉంది, అయితే ఇది నిశ్చయాత్మకమైనది కాదు.

(మరింత సమాచారం: మధుమేహ సంరక్షణ)

అధిక రక్తపోటు ప్రతి తరంలో సాధారణమైనది. ఇది సాధారణంగా సరిలేని జీవనశైలి మరియు ఆహార అలవాట్లతో ముడిపడి ఉంటుంది మరియు ఇది స్ట్రోక్ మరియు గుండెపోటుకు ఒక ముఖ్యమైన కారణంగా పరిగణించబడుతుంది. ఒక అధ్యయనం ప్రకారం, 2 వారాల పాటు ప్రతిరోజూ 5 ఔన్సుల దానిమ్మ రసాలను తీసుకోవడం వల్ల రక్తపోటు గణనీయంగా తగ్గిందని తెలిసింది. మరో అధ్యయనం దానిమ్మ రసం సిస్టోలిక్ రక్తపోటును గణనీయంగా తగ్గిస్తుందని కనుగొంది.

(మరింత సమాచారం: అధిక రక్తపోటు)

ప్రపంచ వ్యాప్తంగా అకాల మరణానికి అతి సాధారణ కారణాలు గుండెవ్యాధులు. ఒత్తిడి, జీవనశైలి, అధిక రక్తపోటు మరియు శరీరంలోని అసమతుల్య కొలెస్ట్రాల్ స్థాయిలు వంటి వివిధ కారణాలు గుండె వ్యాధుల ప్రాబల్యానికి కారణం. దానిమ్మ గుండె మీద కలిగే అదనపు ఒత్తిడి నుండి ఉపశమనం కలిగించే ఒక మంచి హైపోటెన్సివ్ ఏజెంట్ [hypotensive agent ](రక్తపోటును తగ్గిస్తుంది) గా గుర్తించబడింది. దానిమ్మపండులో ప్యూనిసిక్ ఆసిడ్ అని పిలవబడే ఒక ఫ్యాటీ ఆసిడ్ ఉంటుంది, ఇది గుండె జబ్బుకు వ్యతిరేకంగా రక్షించడంలో సహాయపడుతుందని అధ్యయనాలు సూచిస్తున్నాయి,.

ఒక క్లినికల్ అధ్యయనంలో, అధిక కొలెస్ట్రాల్తో బాధపడుతున్న 51 మందికి నాలుగు వారాల పాటు దానిమ్మపండు గింజల నూనె ఇవ్వడం జరిగింది. నియమిత కాలం ముగిసే సమయానికి, ట్రైగ్లిజరైడ్స్ మరియు అధిక సాంద్రత కలిగిన లిపోప్రొటీన్ల (HDL) యొక్క మెరుగైన నిష్పత్తితో పాటు ట్రైగ్లిజరైడ్ స్థాయిలు గణనీయంగా తగ్గాయి. మరొక అధ్యయనంలో టైప్ 2 డయాబెటిస్ మరియు హైపర్ కొలెస్టెరోలేమియా (అధిక కొలెస్ట్రాల్) తో బాధపడుతున్న వారికీ దానిమ్మపండు రసాన్ని ఇవ్వడం ద్వారా వారిలో చెడు కొలెస్టరాల్ స్థాయిలలో (LDL) గణనీయమైన తగ్గుదల గమనింపబడింది. తక్కువ సాంద్రత కలిగిన లిపోప్రొటీన్ (LDL)లో ఆక్సిడేషన్ జరగడం వలన అది ఎథీరోస్క్లెరోసిస్కు కారణమవుంతుంది, అయితే దానిమ్మ రసం  తక్కువ సాంద్రత కలిగిన లిపోప్రొటీన్ యొక్క ఆక్సిడేషన్ను నిరోధిస్తుందని నిరూపించబడింది.

(మరింత సమాచారం: గుండె వ్యాధి కారణాలు)

అంగస్తంభన లోపం ఆక్సిడెటివ్ డామేజ్ తో ముడిపడి ఉంటుంది, ఇది పురుషాంగ కణజాలంలో రక్త ప్రవాహ తగ్గుదలకు కారణమవుతుంది. సాంప్రదాయకంగా దానిమ్మ రసాన్ని అంగస్తంభన లోపం యొక్క లక్షణాలను తగ్గించడానికి ఉపయోగిస్తారు. జంతువులపై చేసిన అధ్యయనాలు దానిమ్మ రసం పురుషాంగ కణజాలంలో రక్త ప్రవాహాన్ని పెంచుతుందని సూచిస్తుంది, తద్వారా అది అంగస్తంభనకు సహాయపడుతుంది.

ఒక క్లినికల్ అధ్యయనంలో, అంగస్తంభన లోపంతో బాధపడుతున్న  53 పురుషులకు ప్రతిరోజూ దానిమ్మ రసం ఇవ్వబడింది. ఏదేమైనా, ఈ సమస్యను తగ్గించడంలో దానిమ్మపండు రసం ఎలాంటి సంతృప్తికరమైన ప్రభావాలు చూపలేదని ఈ అధ్యయనం నివేదించింది.

అంగస్తంభన లోపం యొక్క చికిత్సలో దానిమ్మ యొక్క సమర్థతను అర్థం చేసుకోవడానికి ఇంకా విస్తృతమైన పరిశోధన అవసరమవుతుంది.

దానిమ్మపండులో హానికరమైన సూక్ష్మజీవులతో పోరాడడంలో సహాయపడే మొక్కల సమ్మేళనాలు (plant compounds) ఉంటాయి. ఇన్ఫెక్షన్లను కలిగించే కాండిడా అల్బికెన్స్ (Candida albicans) అనే ఈస్ట్ పై పోరాడడంలో దానిమ్మపండు చాలా సమర్థవంతంగా ఉంటుందని అధ్యయనాలు సూచిస్తున్నాయి. కాపర్ తో కలిసిన దానిమ్మ సారాలు స్టెఫిలోకోకస్ ఆరియస్ (Staphylococcus aureus) యొక్క మితిసిల్లిన్-రెసిస్టెంట్ స్ట్రెయిన్స్ పై వ్యతిరేకంగా కొన్ని యాంటీమైక్రోబయాల్ చర్యలను కలిగి ఉన్నాయని కనుగొనబడింది. దానిమ్మపండు సారాల యొక్క యాంటీ బాక్టీరియల్ ప్రభావాలను కొన్ని ఓరల్ (నోటి) బ్యాక్టీరియాలను నివారించడంలో చాలా ఉపయోగకరంగా ఉంటాయి, పెరియోడోంటైటిస్ మరియు జింజివైటిస్ వంటి వ్యాధుల నుండి పంటి చిగుళ్ళను మరియు దంతాలను దానిమ్మ రక్షిస్తుంది.

జ్ఞాపకశక్తి మెరుగుదలతో దానిమ్మ ముడిపడి ఉందని కొన్ని అధ్యయనాలు సూచిస్తున్నాయి. శస్త్రచికిత్స జరిగిన రోగులపై చేసిన అధ్యయనంలో దానిమ్మపండు సారం శస్త్రచికిత్స తర్వాత రోగులలో జ్ఞాపకశక్తి లోపాన్ని నిరోధించగలదని సూచించింది. మరోక అధ్యయనం దానిమ్మపండు రసం దృశ్య మరియు శబ్ద మెమోరీ మార్కర్లను (visual and verbal memory markers) మెరుగుపరుస్తుందని సూచిస్తుంది. అంతేకాకుండా, అల్జీమర్స్ యొక్క లక్షణాలపై పోరాడడంలో  కూడా దానిమ్మ సహాయపడుతుందని కనుగొనబడింది.

(మరింత సమాచారం: చిత్తవైకల్యం చికిత్స)

దానిమ్మపండు యొక్క వాపు నిరోధక లక్షణాలు ఆర్థరైటిస్ వలన కలిగే జాయింట్ల వాపును తగ్గించడంలో చాలా ఉపయోగకరంగా ఉంటాయి. దానిమ్మపండు సారాలు ఆస్టియోఆర్థరైటిస్ ఉన్నవారిలో కీళ్ళకు హాని కలిగించే ఎంజైమ్లను నిరోధించడంలో సహాయకరంగా ఉంటుందని ఒక ప్రయోగశాల ఆధారిత పరిశోధన సూచించింది . ఇన్ వివో అధ్యయనాలు కూడా దానిమ్మపండు సారాలకు ఆర్థిరైటిస్ వ్యతిరేక ప్రభావాలు ఉన్నాయని తెలిపాయి. కానీ మానవులపై ఇప్పటివరకు పరిమితమైన పరిశోధన మాత్రమే నిర్వహించబడింది, కాబట్టి దానిమ్మపండు యొక్క యాంటీ-ఆర్థిరైటిక్ ప్రభావాల గురించి మరింత తెలుసుకోవడానికి వైద్యునితో మాట్లాడటం ఉత్తమం.

పురుషులలో సంభవించే క్యాన్సర్లలో సాధారణమైన రకం ప్రోస్టేట్ క్యాన్సర్. క్యాన్సర్ కణాల అభివృద్ధిని నిరోధించేందుకు మరియు క్యాన్సర్ కణాలకు మరణం కలిగించడంలో కూడా దానిమ్మపండు యొక్క సారాలు ఉపయోగకరంగా ఉంటాయని ఒక ప్రయోగశాల ఆధారిత అధ్యయనం తెలిపింది. ప్రోస్టేట్ క్యాన్సర్ కోసం రక్తంలో ఉండే ఒక రకమైన బ్లడ్ మార్కర్ ప్రోస్టేట్-స్పెసిఫిక్ యాంటిజెన్ (PSA). ఈ ప్రోస్టేట్-స్పెసిఫిక్ యాంటిజెన్ సంఖ్య/స్థాయి తక్కువ సమయంలోనే రెట్టింపైతే, అది పురుషులు ప్రోస్టేట్ క్యాన్సర్ కారణంగా మరణించే ప్రమాదాన్ని సూచిస్తుంది. ఒక అధ్యయనం ప్రకారం, దానిమ్మపండు రసాన్ని రోజూ 8 ఔన్సులు తీసుకుంటే ప్రోస్టేట్-స్పెసిఫిక్ యాంటిజెన్ రెట్టింపు అయ్యే సమయాన్ని 15 నెలల నుండి 54 నెలల వరకు పెంచుతుంది, ఇది ఒక విశేషమైన చర్య అని ఆ అధ్యయనం సూచించింది. మరొక అధ్యయనం దానిమ్మపండు సారాన్ని ఉపయోగించి ఇదే ఫలితాన్ని కనుగొంది.

ఇతర అధ్యయనాలు కూడా, రొమ్ము క్యాన్సర్ కణాల పెరుగుదలను దానిమ్మపండు సారాలు నిరోధిస్తాయని పేర్కొన్నాయి. అయితే, ప్రయోగశాల అధ్యయనాలకు మాత్రమే ఈ రుజువు పరిమితమై ఉంది. క్యాన్సర్ పై దానిమ్మ ప్రభావాలను ధృవీకరించడానికి మరింత పరిశోధన అవసరం.

(మరింత సమాచారం: క్యాన్సర్ రకాలు)