myUpchar प्लस+ के साथ पूरेे परिवार के हेल्थ खर्च पर भारी बचत

సారాంశం

రొమ్ము చర్మంపై చికాకు కలగడాన్ని రొమ్ము దురద అని పిలుస్తారు. చర్మం పై ధూళి/దుమ్ము ఉండటం దురదకు కారణం కావచ్చు మరియు చర్మాన్ని పూర్తిగా శుభ్రపరచడం వలన అది దురద నుండి బయటపడడంలో సహాయపడుతుంది. అయినప్పటికీ, రొమ్ము దురదకు ఇతర కారణాలు కూడా ఉండవచ్చు, వాటిలో ఫంగల్ ఇన్ఫెక్షన్లు, బ్యాక్టీరియా ఇన్ఫెక్షన్లు, దుస్తుల రాపిడి, హార్మోన్ల మార్పులు మరియు అరుదైన సందర్భాల్లో క్యాన్సర్ వంటివి ఉంటాయి. దురదతో పాటు వాపు మరియు చర్మం ఎర్రగా మారడం వంటి ఇతర లక్షణాలు కూడా ఉంటాయి. క్లినికల్ పరీక్ష ద్వారా తగిన నిర్ధారణ జరిగిన తరువాత, క్రీములు, జెల్ మరియు యాంటిహిస్టామైన్లు వంటి మందులను దురద చికిత్సకు ఉపయోగిస్తారు. అదనంగా, గృహ నివారణ చిట్కాలు దురదను వదిలించుకోవడంలో ప్రభావవంతంగా ఉన్నాయని రుజువు చేయబడింది. వీటి ఫలితాలు సాధారణంగా సానుకూలంగా ఉంటాయి మరియు సమస్యలు కలుగడడం చాలా అరుదు. సౌకర్యవంతమైన దుస్తులు ధరించడం, చర్మాన్ని శుభ్రంగా ఉంచుకోవడం మరియు బాగా హైడ్రేటెడ్ గా ఉండడం, వ్యక్తిగత పరిశుభ్రత పాటించడం ద్వారా చెమట మరియు ఇన్ఫెక్షన్లను నియంత్రించడం వంటి నివారణ చర్యలు పాటించవచ్చు.

  1. రొమ్ము దురద అంటే ఏమిటి - What is an itchy breast in Telugu
  2. రొమ్ము దురద యొక్క లక్షణాలు - Symptoms of itchy breast in Telugu
  3. రొమ్ము దురద కారణాలు మరియు ప్రమాద కారకాలు - Itchy breast causes and risk factors in Telugu
  4. రొమ్ము దురద నివారణ - Itchy breast prevention in Telugu
  5. రొమ్ము దురద యొక్క నిర్ధారణ - Diagnosis of itchy breast in Telugu
  6. రొమ్ము దురద చికిత్స - Treatment of itchy breast in Telugu
  7. రొమ్ము దురదకు గృహ నివారణ చిట్కాలు - Home remedies for itchy breast in Telugu
  8. రొమ్ము దురద రోగ సూచన మరియు సమస్యలు - Itchy breast prognosis and complications in Telugu

రొమ్ము దురద అనేది స్త్రీలలో మరియు పురుషులలో సాధారణంగా కలిగే ఒక సంఘటన. రొమ్ము యొక్క దురదను చాలా మంది మహిళలు తరచూ అనుభవిస్తూవుంటారు మరియు ఇది సాధారణంగా ఆందోళన చెందే విషయం కాదు. ఇది చర్మం యొక్క చికాకును సూచిస్తుంది, ఇది చర్మపు దద్దుర్లు మరియు ఎరుపుదనానికి కూడా కారణం కావచ్చు. దురద తరచుగా అసౌకర్యంగా ఉంటుంది మరియు సామాజికంగా ఇబ్బందికరంగా అనిపిస్తుంది. రొమ్ములలో తేలికపాటి దురద కలుగడం, ఇది సహజంగానే  కొన్ని నిమిషాల్లోనే దానికదే తగ్గిపోతుంది, ఇది సాధారణంగా ఆందోళన కలిగించే విషయం కాదు. దురదకు మరింత తీవ్రమైన కారణం ఏదైనా ఉంటే, అప్పుడు అది ఇతర లక్షణాలతో కూడి ఉంటుంది తద్వారా మనం కారణాన్ని గుర్తించవచ్చు.

రొమ్ముల దురదతో పాటు వచ్చే ఇతర సాధారణ లక్షణాలు ఈ క్రింది విధంగా ఉంటాయి:

  • రొమ్ము మీద మరియు చనుమొన ప్రాంతంలో చికాకు.
  • వాపు కారణంగా ఎరుపుదనం.
  • దద్దుర్లు.
  • చిన్న చిన్న బొబ్బలు.
  • జలదరింపు సంచలనం.
  • నిరంతరంగా గోకుకోవాలి అనిపించడం.

రొమ్ము దురద కలగడానికి ఏదైనా అంతర్లీన కారణం ఉంటే, ఆ కారణానికి సంబంధించి ఇతర లక్షణాలు కూడా కనిపిస్తాయి.

ఫంగల్ ఇన్ఫెక్షన్ విషయంలో, దురదతో పాటు ఇవి ఉండవచ్చు

  • రొమ్ము కింద దద్దుర్లు.
  • చర్మం పొరలుగా మారడం.
  • ప్రభావిత ప్రాంతంపై తెల్ల బొబ్బలు.

ఈ లక్షణాలు రొమ్ముకు మాత్రమే పరిమితం కాకపోవచ్చు మరియు శరీరంలోని వివిధ భాగాలలో కూడా కనిపించవచ్చు.

దురదకు కారణం రొమ్ము క్యాన్సర్ అయితే, రొమ్ము దురద ఇతర లక్షణాలతో కలిపి ఉంటుంది, అవి:

  • వాపు.
  • చర్మం మందంగా/గట్టిగా మారడం.
  • చనుమొనలో లేదా రొమ్ములో గడ్డ.
  • నొప్పి.
  • సున్నితత్వం.
  • చనుమొన నుండి అసాధారణ స్రావం.
  • అసాధారణత ఉన్న ప్రాంతంలో వెచ్చదనం.
  • చనుమొన పరిమాణం, స్థానం మరియు రూపంలో మార్పులు.

కారణాలు

రొమ్ము దురదల యొక్క సాధారణ కారణాలు ఈ క్రింద ఇవ్వబడ్డాయి:

  • కాంటాక్ట్ డెర్మటైటిస్
    కాంటాక్ట్ డెర్మటైటిస్ అనేది ఒక చర్మ సమస్య, ఇది తీవ్రమైన దురదకు దారితీస్తుంది. ఇది తరచూగా చర్మం మీద వాపు మరియు చికాకు కలిగించే కొన్ని పదార్ధాలకు సున్నితత్వం (sensitivity) ఉండడం వలన కలుగుతుంది. కొన్ని సౌందర్య ఉత్పత్తులు, పరిమళ ద్రవ్యాలు, క్రీములు లేదా దుస్తులలో ఉండే పదార్దాలకు గురికావడం అనేది కాంటాక్ట్ డెర్మటైటిస్ కు కారణమవుతుంది. ఆ ప్రాంతంలో సున్నితత్వం మరియు చర్మం బిరుసుగా మారడంతో పాటు దద్దుర్లు ఉండవచ్చు లేదా చర్మం పొడిగా మరియు పొలుసులుగా మారవచ్చు.
  • జోగర్స్ నిపిల్ (Jogger’s Nipple)
    క్రీడలు ఆడుతున్న సమయంలో, బిరుసుగా (గరుకైన) ఉండే దుస్తులు లేదా లోదుస్తులను చర్మంపై నిరంతరంగా రాసుకోవడం/రుద్దుకోవడం వలన చనుమొన మరియు దాని చుట్టుపక్కల చర్మం ఉడక కు గురవుతుంది. దీనిని తరచుగా జోగర్స్ నిపిల్ అని పిలుస్తారు మరియు ఇది తేలికపాటి దురద మరియు వాపును కలిగిస్తుంది. ఇది సాధారణంగా మాయిశ్చరైజర్లను ఉపయోగించడం ద్వారా మరియు కాటన్ వంటి మృదువైన పదార్థాలతో తయారు చేసిన సరైన క్రీడా దుస్తులను ధరించడం ద్వారా పరిష్కరించబడుతుంది.
  • అటోపిక్ డెర్మటైటిస్ 
    తామర అని కూడా పిలువబడే అటోపిక్ డెర్మటైటిస్, అన్ని వయసుల స్త్రీలలో రొమ్ముల దురదను కలిగిస్తుంది. పొడి చర్మం ఉండడం, అలెర్జీ కారకాలకు గురికావడం మరియు ఒత్తిడి వంటివి తామర మంటలకు కారణమవుతాయి. రాపిడి కూడా దురదకు కారణం కావచ్చు.
  • ఫంగల్ ఇన్ఫెక్షన్
    కాండిడా (Candida) జాతుల వల్ల కలిగే ఫంగల్ ఇన్ఫెక్షన్ ముఖ్యంగా చనుమొనల మీద మరియు వాటి చుట్టూ దురదకు దారితీస్తుంది,. కాండిడా చర్మం యొక్క మడతలలో పెరుగుతుంది, ఇక్కడ తరచుగా చెమట పేరుకుంటుంది. వేడి మరియు తేమ ఉనికి దాని వేగవంతమైన వ్యాప్తి దారితీస్తుంది. కాండిడా సంక్రమణ కారణంగా పొడిదనం, మంట, వాపు, ఎరుపుదనం మరియు చిన్న చిన్న బొబ్బలు ఏర్పడటం వంటి లక్షణాలు కూడా అభివృద్ధి చెందుతాయి. ఫంగల్ ఇన్ఫెక్షన్ శరీరంలోని ఇతర ప్రాంతాలపై దురదకు దారితీస్తుంది ఉదా. గజ్జలు, చంకలు, రొమ్ముల క్రింద వంటి భాగాలలో.
  • పేగెట్స్ వ్యాధి (Paget’s Disease)
    చనుమొన యొక్క పేగెట్స్ వ్యాధి రొమ్ము క్యాన్సర్ యొక్క అరుదైన రూపం. ఇది చనుమొన మరియు చుట్టుపక్కల చర్మాన్ని ప్రభావితం చేస్తుంది. ఈ వ్యాధి ఎక్కువగా మహిళల్లో సంభవిస్తున్నప్పటికీ, ఇది పురుషులలో కూడా సంభవిస్తుంది. ప్రభావిత ప్రాంతంలో దురద కలుగడం దాని ప్రాధమిక లక్షణాలలో ఒకటి. ఇది చనుమొన పై లేదా దాని చుట్టూ చర్మం పెచ్చులుగా ఏర్పడడానికి దారితీస్తుంది, ఎరుపుదనం మరియు సున్నితత్వాన్ని కలిగిస్తుంది.
  • హార్మోన్ల మార్పులు
    ఋతుక్రమం ప్రారంభమయ్యే ముందు హార్మోన్ల మార్పులు రొమ్ములలో దురదకు కారణమవుతాయి ఎందుకంటే ఋతుచక్రం యొక్క ఆ సమయంలో రొమ్ములు కొంచెం పెద్దవిగా పెరుగుతాయి. రుతువిరతి (మోనోపాజ్) సమయంలో హార్మోన్ల మార్పులు కూడా రొమ్ములలో దురదకు కారణమవుతాయి. హార్మోన్ల మార్పుల వల్ల కలిగే దురద వేగంగానే నయమవుతుంది మరియు పెద్దగా అసౌకర్యాన్ని కలిగించదు.
  • ఇన్ఫలమేటరీ రొమ్ము క్యాన్సర్ (Inflammatory Breast Cancer)
    కణితి విషయంలో, దానిపై చర్మం ఎరుపుగా మరియు సున్నితంగా  మారుతుంది. అందువల్ల, దీనిలో రొమ్ము చర్మంపై ఏర్పడే పాచెస్‌లో దురద మరియు వాపు  సంభవించవచ్చు. అయినప్పటికీ, రొమ్ము దురద క్యాన్సర్ యొక్క అరుదైన లక్షణం. చనుమొన నుండి స్రావాలు కారడం మరియు గడ్డ యొక్క పెరుగుదల వంటి ఇతర ముఖ్య లక్షణాలతో పాటు ఇది సంభవిస్తే, వెంటనే దానికోసం వైద్య సహాయం అవసరం.
  • గర్భధారణ
    గర్భిణీ స్త్రీలు సాధారణంగా రొమ్ములలో దురద మరియు చనుమొనలలో సలుపును అనుభవిస్తారు. ఇది గర్భధారణ సమయంలో హార్మోన్ల మార్పులు మరియు రొమ్ము సున్నితత్వంతో ముడిపడి ఉంటుంది. వాస్తవానికి, చనుబాలిచ్చే స్త్రీలు చనుమొనలలో దురదను కూడా అనుభవించవచ్చు, ఇది వారు పాలివ్వడాన్ని కొద్దిగా కష్టంగా మరియు అసౌకర్యంగా ఉండేలా చేస్తుంది.
  • రొమ్ములో కురుపులు 
    రొమ్ములో కురుపులు ఏర్పడడం అనేది బ్యాక్టీరియా చర్మం ద్వారా రొమ్ములోకి ప్రవేశించినప్పుడు సంభవించే ఒక అసాధారణమైన బాక్టీరియల్ ఇన్ఫెక్షన్. సాధారణంగా ఇది చనుబాలిచ్చే మహిళల్లో కనిపిస్తుంది. చీలుకుపోవడం వంటి ఏదైనా చర్మ కణజాలపు గాయం బ్యాక్టీరియా సంక్రమణకు దారితీస్తుంది, ఇది రొమ్ములలో దురదకు దారితీయడమే కాకుండా, రొమ్ములో చీము లేదా ద్రవంతో నిండిన పొక్కులు ఏర్పడటానికి కూడా దారితీస్తుంది.
  • మాస్టైటిస్ (Mastitis)
    మాస్టిటిస్ అంటే రొమ్ములోని కణజాలాల వాపు లేదా ఉబ్బు ఇది సాధారణంగా చనుబాలిచ్చే మహిళల్లో కనిపిస్తుంది. పాల వాహికలలో నిలిచిపోయిన పాలు అడ్డంకిని సృష్టిస్తాయి, అది బ్యాక్టీరియా పెరుగుదలకు దారితీస్తుంది. ఈ ఇన్ఫెక్షన్ దద్దుర్లు, దురద మరియు జ్వరం వంటి  లక్షణాలను కలిగిస్తుంది.
  • క్షీర (పాల) వాహిక ఎక్టసియా (Mammary Duct Ectasia)
    ఇది చాలా అరుదైన పరిస్థితి, దీనిలో పాల నాళాలు మందముగా మరియు పెద్దవిగా మారతాయి. ఇది చనుమొన నుండి స్రావాలు కారడానికి కారణం కావచ్చు మరియు చనుమొన నిరోధించబడితే పాలు పేరుకుపోవడానికి దారితీస్తుంది. ఇది రొమ్ము లోపలి నుండి పుట్టే దురదకు దారితీస్తుంది.

    చర్మం యొక్క ఏ ప్రాంతానైనా ప్రభావితం చేసే సోరియాసిస్ వంటి చర్మ సమస్యలు రొమ్ములను కూడా ప్రభావితం చేయవచ్చు, తద్వారా అది దురద, పొలుసులు ఏర్పడడం మరియు ఎరుపుదనానికి కారణమవుతుంది.

ప్రమాద కారకాలు

రొమ్ము మీద దురదకు కారణమయ్యే కారకాలు చాలా ఉన్నాయి. అవి వీటిని కలిగి ఉండవచ్చు:

  • చురుకైన అథ్లెట్లుగా ఉన్న మహిళలు మరియు పురుషులు దురదను ఎదుర్కొనే అవకాశం ఉంటుంది.
  • పేలవమైన పరిశుభ్రతను పాటించే వ్యక్తులకు ఫంగల్ లేదా బాక్టీరియల్ ఇన్ఫెక్షన్ల వల్ల దురద వచ్చే అవకాశం ఉంటుంది.
  • గర్భిణీలు మరియు పాలిచ్చే స్త్రీలు రొమ్ములలో దురదను ఎదుర్కొనే అవకాశం ఉంటుంది.
  • కౌమారంలో ఉన్న ఆడపిల్లలు రొమ్ములలో దురదను ఎదుర్కొనే అవకాశం ఉంది, ఎందుకంటే ఈ సమయంలో వారి శరీరం పెరుగుతుంది మరియు అనేక హార్మోన్ల మార్పులకు లోనవుతుంది.
  • సున్నితమైన చర్మం ఉన్నవారు లేదా చర్మ వ్యాధులు ఉన్నవారు అలెర్జీ కారకాలకు ప్రతిస్పందించవచ్చు. అందువల్ల, అటువంటి వారికి కూడా రొమ్ములపై ​​దురద వచ్చే ప్రమాదం ఉంటుంది.

రొమ్ములలో దురదను నివారించడానికి కొన్ని నివారణ చర్యలు కూడా అనుసరించవచ్చు, అవి:

  • వ్యాయామం చేసేటప్పుడు చెమటను పీల్చుకోవడానికి కాటన్ లైనింగ్‌తో ఉండే సరైన లోదుస్తులు/బ్రా ధరించాలి. వదులుగా పత్తి (కాటన్) దుస్తులు ధరించాలి. వేడి మరియు తేమను కలిగించే సింథటిక్ బట్టలు ధరించడం మానుకోవాలి.
  • ముఖ్యంగా శీతాకాలంలో మీ చర్మాన్ని హైడ్రేటెడ్ గా మరియు తేమగా ఉంచుకోండి.
  • దురదను మొదలైన వెంటనే ఉపశమనానికి కాలమైన్ లోషన్ ను ఉపయోగించండి.
  • స్నానం చేసిన తర్వాత మీరు ఏవైనా బట్టలు ధరించే ముందు చర్మం ఆరే వరకు వేచి ఉండండి.
  • చర్మాన్ని శుభ్రంగా ఉంచుకోండి.
  • పెర్ఫ్యూమ్స్ మరియు డియోడరెంట్లను నేరుగా చర్మంపై వాడకండి.
  • చర్మంపై కఠినంగా ఉండే చర్మ సంరక్షణ ఉత్పత్తులను వాడడాన్ని నివారించండి.

సాధారణంగా , లక్షణాల గురించి స్త్రీ యొక్క వివరణ ఆధారంగా వైద్యులు దురదను నిర్ధారిస్తారు. శారీరక పరీక్ష దురద కారణాన్ని గుర్తించడంలో సహాయకరంగా ఉంటుందని రుజువు చేయబడింది. సర్వసాధారణంగా, వైద్యులు ఫంగల్ సంక్రమణను లక్షణాలు మరియు చర్మ మార్పుల ఆధారంగా గుర్తిస్తారు, ఇది (ఫంగల్ ఇన్ఫెక్షన్) రొమ్ములపై ​​దురదకు అత్యంత సాధారణ కారణాలలో ఒకటి. చాలా అరుదైన సందర్భాల్లో మాత్రమే, వైద్యులు తదుపరి పరీక్షల కోసం చర్మ నమూనాను తీసుకోవచ్చు.

  • వైద్యులు ఏదైనా తీవ్ర సమస్యను అనుమనించినట్లయితే మాత్రమే రక్తంలో చక్కెర స్థాయిని లేదా తెల్ల రక్త కణాల సంఖ్యను తెలుసుకోవడానికి రక్త పరీక్షలు చేయవచ్చు. ఇది ఏదైనా అంతర్లీన సంక్రమణను గుర్తించడానికి సహాయపడుతుంది. అయితే, చాలా సందర్భాలలో ఇది అవసరం ఉండదు.
  • రొమ్ము క్యాన్సర్ అనుమానాన్ని నివృత్తి చేసుకోవడానికి మామోగ్రామ్ (రొమ్ముల యొక్క ఎక్స్-రే), అల్ట్రాసౌండ్, ఎంఆర్ఐ (MRI) స్కాన్ లేదా బయాప్సీ (చర్మ కణజాలం యొక్క చిన్న భాగాన్ని తీసుకోవడం) వంటి రోగనిర్ధారణ పరీక్షలు నిర్వహించవచ్చు.

దురద రొమ్ము చికిత్స సాధారణంగా ఇంట్లోనే నిర్వహించబడుతుంది. డాక్టర్ వీటిని సూచించవచ్చు

  • సమయోచిత క్రీములు
    ప్రభావిత ప్రాంతం యొక్క ఉపరితలంపై క్రీములు లేదా జెల్ లు  పూయబడతాయి సాధారణంగా దురద మరియు మంటను అణిచివేసేందుకు అవి మందును కలిగి ఉంటాయి. సంక్రమణలకు చికిత్స చేయడానికి ఈ క్రీమ్లు యాంటీ బాక్టీరియల్ మరియు యాంటీ ఫంగల్ ఏజెంట్లను కలిగి ఉండవచ్చు.
  • యాంటీ హిస్టమైన్లు (Antihistamines) 
    పర్యావరణానికి సంబంధించిన అలెర్జీ కారకం వలన అలెర్జీ ప్రతిచర్య కలిగినప్పుడు ఏర్పడిన దురదను తగ్గించడానికి యాంటిహిస్టామైన్లు సహాయపడతాయి. యాంటీహిస్టామైన్లను ఓరల్ గా (నోటి ద్వారా) తీసుకోవచ్చు లేదా త్వరిత ఉపశమనం కోసం ఇంజెక్షన్ల ద్వారా కూడా ఇవ్వవచ్చు. ఇటువంటి మందులు స్థానిక ఫార్మసీలలో సులభంగా లభిస్తాయి కానీ, వైద్యులని సంప్రదించకుండా వాటిని తీసుకోవడం మంచిది కాదు.

    రొమ్ము దురదకు చికిత్స తరచుగా కారణం మీద ఆధారపడి ఉంటుందని గుర్తుంచుకోవడం కూడా ముఖ్యం. అయితే చర్మ సమస్యలు లేదా హార్మోన్ల మార్పులు వంటి తాత్కాలిక ఆరోగ్య సమస్యల వల్ల దురద ఏర్పడితే, తక్కువ చికిత్స సరిపోతుంది, క్యాన్సర్ లేదా ఇతర వ్యాధుల వంటి కారణాలకు భిన్నమైన చికిత్సా విధానం అవసరం శస్త్రచికిత్స, కెమోథెరపీ లేదా రేడియేషన్ థెరపీ వంటివి.

జీవనశైలి నిర్వహణ
రొమ్ములలో దురదను తగ్గించడంలో సహాయపడే కొన్ని జీవనశైలి నిర్వహణ చిట్కాలు ఉన్నాయి. ఇంట్లో చేయగల కొన్ని నిర్వహణ చిట్కాలు క్రింది విధంగా ఉంటాయి:

  • మీకు దురద మరియు వాపు కలిగించే అలెర్జీ కారకాల గురించి తెలుసుకోండి. ఈ అలెర్జీ కారకాలను గుర్తించడం అనేది ఉపయోగకరమైన నివారణ చర్యగా ఉంటుంది.
  • ప్రభావిత చర్మాన్ని కడుక్కోవడానికి తేలికపాటి సాంద్రత ఉన్న సబ్బులను ఉపయోగించండి. సువాసనగల (సెంటెడ్) సబ్బులు వాడటం మానుకోండి అవి చర్మం పొడిబారడానికి కారణమవుతాయి. ప్రభావిత చర్మానికి ఉపశమనం కలిగించడానికి మరియు ఏదైనా అలెర్జీ కారకం యొక్క ప్రతిచర్యను తగ్గించడానికి హైపోఎలర్జెనిక్ వాష్ లు సహాయపడతాయి.
  • చర్మ పొడిదనాన్ని తగ్గించడానికి లోషన్లు ఉపయోగించండి.

రొమ్ము దురద కోసం కొబ్బరి నూనె - Coconut oil for breast itching in Telugu

ఎలా ఉపయోగించాలి

ఒక టీస్పూన్ కొబ్బరి నూనెను రొమ్ముల మీద రాయండి. అదనపు సుగంధాలు/వాసనలు లేని స్వచ్ఛమైన కొబ్బరి నూనె వాడకం సిఫార్సు చేయబడుతుంది. ఈ నూనెను రోజుకు 2-3 సార్లురాయండి. స్నానం చేసిన వెంటనే కూడా కొబ్బరి నూనె పూయవచ్చు, తద్వారా ఇది చర్మంలో బాగా ఇంకుతుంది.

ప్రయోజనాలు

కొబ్బరి నూనె వాపు మరియు దురదకు ఉపశమనం తగ్గించడం కోసం ఒక అద్భుతమైన ఎంపిక. ఇది యాంటీ ఫంగల్ మరియు యాంటీ బాక్టీరియల్ లక్షణాలను కలిగి ఉంటుంది. పొడి చర్మాన్ని మృదువుగా చేయడానికి కూడా ఇది సహాయపడుతుంది. దీనిని చర్మంపై వాడటం సురక్షితం కూడా.

దురద రొమ్ము కోసం టీ ట్రీ ఆయిల్ - Tea tree oil for itchy breast in Telugu

ఎలా ఉపయోగించాలి

టీ ట్రీ నూనెను ఉపయోగించడానికి, ఒక టీస్పూన్ కొబ్బరి నూనెలో ఈ నూనెను కలపండి. బాగా కలిపి తర్వాత ప్రభావిత ప్రాంతాలపై పూయండి. టీ ట్రీ ఎసెన్షియల్ ఆయిల్ ను నేరుగా చర్మంపై పూయకండి. నూనె మిశ్రమాన్ని రోజుకు కనీసం రెండుసార్లు రాయండి.

ప్రయోజనాలు

టీ ట్రీ ఆయిల్ కు యాంటీ బాక్టీరియల్ మరియు యాంటీ ఫంగల్ లక్షణాలు ఉంటాయి. అందువలన, ఇది దురద మరియు ఇన్ఫెక్షన్లను నివారిస్తుంది.

రొమ్ము దురదకు కలబంద ప్రయోజనాలు - Aloe vera benefits for itchy breast in Telugu

ఎలా ఉపయోగించాలి

ప్రభావిత ప్రాంతం మీద  కొద్దిగా చల్లని కలబంద జెల్ ను పూయండి మరియు జెల్ లోపలి ఇంకేవరకు మెత్తగా మసాజ్ చేయండి. ఇలా రోజుకు కనీసం 2-3 సార్లు చేయండి.

ప్రయోజనాలు

కలబంద జెల్ చర్మంపై ఉపశాంతి లక్షణాలను కలిగి ఉంటుంది. ఇది దురదను తగ్గించడంలో మరియు పొడి చర్మాన్ని హైడ్రేట్ చేయడంలో సహాయపడుతుంది. అందువల్ల, ఇది కొన్ని నిమిషాలలోనే  దురద నుండి ఉపశమనం కలిగిస్తుంది. కలబంద జెల్ సున్నితమైన చర్మానికి కూడా అనుకూలంగా ఉంటుంది.

రొమ్ము దురద కోసం వోట్మీల్ - Oatmeal for itchy breast in Telugu

ఎలా ఉపయోగించాలి

మీరు స్నానం చేసే నీటిలో 1-2 కప్పుల వోట్మీల్ వేసి 10-15 నిమిషాలు వాటిని నానబెట్టండి. మీరు ఓట్ మీల్ పేస్ట్ ను కూడా తయారు చేసుకోవచ్చు, దానిని ప్రభావిత ప్రాంతాలపై అప్లై చేసి, 15 నిమిషాల తరువాత గోరువెచ్చని నీటితో శుభ్రం చేసుకోవచ్చు.

ప్రయోజనాలు

తామర కారణంగా కలిగే వాపు నుండి ఉపశమనం పొందడానికి వోట్మీల్ స్నానం మరియు వోట్మీల్ పేస్టులను తరచుగా ఉపయోగిస్తారు. వోట్మీల్ ను ఔషధంగా ఉపయోగించడం వల్ల వాపును మరియు ఎరుపుదనాన్ని తగ్గించడానికి సహాయపడుతుంది. ఇది దురదను కూడా నివారిస్తుంది.

రొమ్ము దురద కోసం బేకింగ్ సోడా - Baking soda for itchy breast in Telugu

ఎలా ఉపయోగించాలి

మీరు స్నానం చేసే నీటిలో 3-4 టేబుల్ స్పూన్ల బేకింగ్ సోడా వేసి రోజూ ఒకసారి చర్మాన్ని శుభ్రపరచుకోండి. రొమ్ముల దురద చికిత్స కోసం మాత్రమే దానిని ఉపయోగించాలనుకుంటే, అప్పుడు ఒక టీస్పూన్ బేకింగ్ సోడాను రెండు కప్పుల నీటిలో వేసి దానితో ప్రభావిత ప్రాంతాన్ని శుభ్రం చేసుకోండి.

ప్రయోజనాలు

బేకింగ్ సోడా వాపును తగ్గించడానికి మరియు బ్యాక్టీరియాను తొలగించడానికి సహాయపడుతుంది.

రోగ సూచన 

రొమ్ముల దురదను సాధారణంగా చాలా ప్రభావవంతంగా నిర్వహించవచ్చు మరియు దానితో ముడిపడి ఉండే సమస్యలు పెద్దగా తీవ్రమైనవి కావు. పరిస్థితిని పరిష్కరించడానికి వేగవంతమైన రోగ నిర్ధారణ మరియు చికిత్స సరిపోతాయి.

సమస్యలు

రొమ్ములో దురదతో ఎటువంటి ముఖ్యమైన సమస్యలు ముడిపడి ఉండవు. అయినప్పటికీ, ఎక్కువ కాలం పాటు మరియు ఇతర లక్షణాలతో ఉంటే, దానిని విస్మరించకూడదు. కారణాన్ని సకాలంలో నిర్ధారించడం వలన అది సమర్థవంతమైన చికిత్సను తీసుకోవడంలో సహాయపడుతుంది.

దురదను తగ్గించుడానికి చర్మాన్ని నిరంతరంగా మరియు తీవ్రంగా గోకకూడదు ఇది రక్తస్రావం మరియు చర్మ దద్దుర్లు కలిగిస్తుంది. చర్మం గట్టిపడటం, దీనిని లైకనిఫికేషన్ (lichenification) అని పిలుస్తారు, అంటే నిరంతర దురద కారణంగా చర్మం నల్లగా మరియు మందంగా మారుతుంది.

और पढ़ें ...

References

  1. MedlinePlus Medical Encyclopedia: US National Library of Medicine; Candida infection of the skin
  2. National Cancer Institute [Internet]. Bethesda (MD): U.S. Department of Health and Human Services; Breast fact sheet
  3. National Health Service [Internet]. UK; Breast abscess.
  4. American Cancer Society [Internet] Atlanta, Georgia, U.S; Duct Ectasia.
  5. National Cancer Institute [Internet]. Bethesda (MD): U.S. Department of Health and Human Services; Breast Changes and Conditions
  6. Infant and Young Child Feeding: Model Chapter for Textbooks for Medical Students and Allied Health Professionals. Geneva: World Health Organization; 2009. SESSION 7, Management of breast conditions and other breastfeeding difficulties.
  7. National Cancer Institute [Internet]. Bethesda (MD): U.S. Department of Health and Human Services; Paget Disease of the Breast