జీలకర్ర నీళ్లు: ఎలా తయారు చెయ్యాలి, ప్రయోజనాలు మరియు దుష్ప్రభావాలు - Cumin water: How to make, benefits and side effects in Telugu

మీరు కొంత అదనపు బరువును తగ్గాలనుకుంటుంటే, జీరా నీరు మీకు తగిన పానీయం అవుతుంది. మేము మాత్రమే కాదు, పరిశోధన కూడా దానిని సూచిస్తుంది. జీలకర్ర నీరు తయారు చేయడానికి మీరు జీలకర్ర విత్తనాలను అలాగే ఉపయోగించినా లేదా వాటిని పొడికి చేసుకుని ఉపయోగించినా, ఏ విధంగానైనా వాటి ప్రయోజనాలను ఖచ్చితంగా పొందవచ్చు.

18 నుండి 50 సంవత్సరాల మధ్య వయస్సులో ఉన్న అధిక బరువు గల వ్యక్తులపై నిర్వహించిన రాండమ్ కంట్రోల్ పరీక్షలో,జీలకర్ర సారాన్ని అధిక మోతాదులో ఇచ్చిన వారు ప్లేసిబో (ఏ మందు లేని ఒక ఔషధ నమూనా) ఇచ్చిన వారికంటే గణనీయమైన బరువు తగ్గుదలను ప్రదర్శించారు. దానితో పాటు నిమ్మకాయ సారం కూడా కలిపినట్లైతే ఈ ప్రయోజనాలను మరింత పెంచుతుందని ఆ అధ్యయనం నివేదించింది. అంటే ఒక కప్పు జీలకర్ర నీటిలో ఒక చెక్క నిమ్మకాయ రసం చేర్చడం ద్వారా మీరు మరింత ఎక్కువ బరువును తగ్గుతారు. ఈ అధ్యయనం యొక్క ఫలితాలు జీలకర్ర నీరు ఏ వయసు వారైనా బరువు తగ్గడానికి సహాయపడుతుంది. కాబట్టి, మీరు ఆందోళన చెందాల్సిన అవసరం లేదు.

బరువు తగ్గుదల పై జీలకర్ర యొక్క ప్రయోజనాలను తెలుసుకోవడానికి నిర్వహించిన మరో అధ్యయనంలో రాండమ్ కంట్రోల్ ట్రయల్ ఆధారంగా ఒక 88 మంది అధిక బరువు ఉన్న వ్యక్తులను ఎంపిక చేసి  రెండు సమూహాలగా విభజించారు. ఈ పరిశోధనలో పెరుగుతో జీలకర్ర కలిపి ఇచ్చిన సమూహంతో కేవలం పెరుగు మాత్రమే ఇచ్చిన సమూహంతో పోల్చినప్పుడు, జీలకర్ర పెరుగు తీసుకున్న వారు మరింత స్పష్టంగా బరువును కోల్పోవడం గమనించబడింది. బరువు తగ్గుదలకు మాత్రమే కాక, జీలకర్ర మరియు పెరుగు కలయిక శరీర చుట్టుకొలత మరియు మొత్తం బిఎంఐ (BMI,బాడీ మాస్ ఇండెక్స్) తగ్గింపుకు కూడా సహాయపడిందని తెలిసింది. ఈ ఫలితాలన్నీ బరువు తగ్గడంలో జీరా లస్సీ యొక్క ప్రయోజనాలను తెలిపాయి. కాబట్టి, బరువు తగ్గడానికి మీరు రోజూ తీసుకునే లస్సీ లేదా పెరుగులో జీలకర్రను కలపండి.

జీలకర్ర నీరు మరియు జీలకర్ర లస్సీ రెండింటి యొక్క రెసిపీ (తయారీ విధానం) ఈ వ్యాసంలో అందించబడింది.

నీటితో కలిపినప్పుడు, జీలకర్ర నీటిలోకి కొన్ని ఫ్లేవనాయిడ్లు మరియు ఆల్కలాయిడ్లను విడుదల చేస్తుంది, అప్పుడు జీలకర్ర ముఖ్యమైన యాంటీఆక్సిడెంట్ లక్షణాలను అందిస్తుందని అనేక అధ్యయనాల ద్వారా నిరూపితమైంది. యాంటీఆక్సిడెంట్లు అంటే ఫ్రీ రాడికల్స్ వల్ల కలిగే ఆక్సీకరణ నష్టానికి వ్యతిరేకంగా పోరాడే పదార్థాలు. ఇది శరీర అవయవాలకు కలిగే నష్టాన్ని తగ్గించడంలో సహాయపడుతుంది.

ఫ్రీ రాడికల్స్ యొక్క చర్య ద్వారా ప్రభావితమయ్యే ఒక ప్రధాన అవయవం మన చర్మం. ఫ్రీ రాడికల్స్ వాటి యొక్క దాడి ద్వారా అకాల వృద్ధాప్య సంకేతాలను కలిగిస్తాయి. ఇది ముడతలు, గీతలు, పెద్ద వయస్సు మచ్చలు మరియు ఇతర వృద్ధాప్య సంకేతాలను ముందుగానే కలిగిస్తుంది. ఒక గ్లాసు జీలకర్ర నీరుతో ఈ సంకేతాల పురోగతిని నిరోధించే అవకాశం ఉంటుంది మరియు చర్మ  రూపాన్ని మెరుగుపరచడంలో కూడా సహాయపడుతుంది.

వీటితో పాటు జీలకర్ర యాంటీ అలెర్జీక్ అని పరిశోధకులు నిరూపించారు. కాబట్టి, చర్మ అలెర్జీల నివారణలో దీని పాత్ర ఉండవచ్చు కానీ ఈ ప్రభావం వ్యక్తిగతంగా అధ్యయనం చేయబడలేదు. కాబట్టి, చర్మ అలెర్జీ ఉన్నవారికి దీని ఉపయోగం సిఫారసు చేయబడలేదు.

జీలకర్ర జీర్ణక్రియను మెరుగుపరచడంలో దాని యొక్క ప్రయోజనాలకు చాలా కాలంగా ప్రసిద్ది చెందింది, అయితే జీలకర్ర నీరు సంగతి ఏమిటి?

జీర్ణవ్యవస్థకు జీలకర్ర నీరు మరింత ప్రయోజనకరంగా ఉంటుందని పరిశోధనలు చెబుతున్నాయి. ఇది మలబద్ధకం మరియు ఉదర అసౌకర్యం వంటి సాధారణ వ్యాధుల నుండి ఉపశమనం కలిగించడమే కాక, ఇర్రిటబుల్ బౌల్ సిండ్రోమ్ వంటి తీవ్రమైన రుగ్మతల నిర్వహణకు సహాయపడుతుంది.

ఇర్రిటబుల్ బౌల్ సిండ్రోమ్‌తో బాధపడుతున్న 57 మంది రోగులపై నిర్వహించిన ఒక అధ్యయనం జీలకర్ర నీరు ఈ సమస్య లక్షణాలను తగ్గించడంలో సహాయపడిందని నిర్ధారించింది. ఈ అధ్యయనంలో పాల్గొన వారికీ అధ్యయన సమయమంతా ఇతర చికిత్సలు అందించలేదు మరియు జీలకర్ర సారాన్ని జీలకర్ర ఎసెన్షియల్ ఆయిల్ రూపంలో నీటితో కలిపి ఇచ్చారు. ఇర్రిటబుల్ బౌల్ సిండ్రోమ్‌, దీనిలో పొత్తికడుపులో తీవ్రమైన నొప్పితో పాటు మలవిసర్జన యొక్క ఫ్రీక్వెన్సీలో మరియు మలము రీతిలో మార్పులు వంటి లక్షణాలు ఉంటాయి, జీరకర్ర నీటి వినియోగం వలన ఈ సమస్య గణనీయంగా మెరుగుపడింది. ఉదయం మరియు రాత్రి ఒక గ్లాసు గోరువెచ్చని నీటిలో జీలకర్ర నూనె యొక్క 20 చుక్కలు కలిపి ఇవ్వడం ద్వారా ఈ ప్రభావాలు సాధించబడ్డాయి.

2 నుండి 4 వారాల వ్యవధి తరువాత, కడుపు నొప్పి, ఉబ్బరం, మలవిసర్జన సమస్యలు, మలవిసర్జన అలవాట్లలో మార్పులు మరియు అసంపూర్ణమైన మలవిసర్జన వంటి లక్షణాలు తగ్గడం గమనించబడ్డాయి. అతిసారం, విరేచనాలు, బాధాకరమైన మలవిసర్జన మరియు మలబద్ధకం వంటి వాటిలో ఉపశమనం లభించింది. ఇంకా, అధ్యయనంలో పాల్గొన్నవారిలో వికారం తగ్గుదల కూడా నివేదించబడింది.

జీర్ణవ్యవస్థ ఆరోగ్యం పై ఈ ఒక మూలిక ఎన్ని అద్భుతాలు చేస్తుందో కదా? మీ దగ్గర జీలకర్ర ఎసెన్షియల్ నూనె లేకపోతే చింతించకండి, ఒక గ్లాసు నీటిలో కలిపిన జీలకర్ర విత్తనాలు కూడా అంతే అద్భుతంగా పనిచేస్తుంది.

శరీరం యొక్క గ్లూకోజ్ జీవక్రియలో మార్పుల కారణంగా రక్తంలో చక్కెర స్థాయిలు పెరగడం వలన మధుమేహం సంభవిస్తుంది. ఇది ఒక దీర్ఘకాలిక పరిస్థితి మరియు మధుమేహంతో బాధపడుతున్న వ్యక్తులు తరచుగా దాని నిర్వహణలో ఇబ్బందులను ఎదుర్కొంటారు.

మీరు ఉదయం పూట చక్కెర వేసుకుని త్రాగే టీకి బదులుగా ఒక కప్పు జీలకర్ర నీటిని తీసుకోండి. ఇది మీకు రెండు విధాలుగా సహాయపడుతుంది. ఒకటి, అధిక చక్కెర తీసుకోవడాన్ని నివారిస్తుంది మరియు రెండవది జీలకర్ర నీరు హైపోగ్లైసిమిక్ చర్యలను కలిగి ఉంటుంది. నీటితో కలిపినప్పుడు, జీలకర్ర శక్తివంతమైన హైపోగ్లైసీమిక్ ఏజెంట్ లా పనిచేస్తుంది. పరిశోధనలో పాల్గొన్నవారిలో ప్లేసిబో మరియు విటమిన్ ఇ సారాలు ఇచ్చిన వారితో పోల్చితే, జీలకర్ర నీరు ఇచ్చిన వారిలో డయాబెటిస్ ఇండెక్స్ లో మెరుగైన తగ్గింపును కలిగించడంలో సహాయపడిందని గమనించబడింది.

ఇప్పటికే చెప్పినట్లుగా, జీలకర్రలో యాంటీఆక్సిడెంట్ గుణాలు ఉన్నాయి, ఇవి గుండెతో సహా ఇతర అంతర్గత అవయవాలకు కలిగే నష్టాన్ని తగ్గించడంలో సహాయపడతాయి. రియాక్టివ్ ఆక్సిజన్ జాతులు గుండెకు హాని కలిగించడానికి కారణమవుతాయి మరియు అథెరోస్క్లెరోసిస్ మరియు కరోనరీ హార్ట్ డిసీజ్ వంటి హృదయ రుగ్మతలకు కారణం అవుతాయి. దాని యాంటీఆక్సిడెంట్ ప్రభావంతో, జీలకర్ర నీరు ఈ వ్యాధుల నివారణలో పాత్ర కలిగి ఉండవచ్చు.

అది ఇంకా ధ్రువీకరించబడనప్పటికీ, రక్త కొలెస్ట్రాల్ తగ్గింపులో జీలకర్ర పాత్రను కొన్ని పరిశోధన ఆధారాలు తెలిపాయి. జీలకర్ర టోటల్ కొలెస్ట్రాల్, తక్కువ-సాంద్రత కలిగిన లిపోప్రొటీన్ (చెడు కొలెస్ట్రాల్), ట్రైగ్లిజరైడ్లను తగ్గించడంలో సహాయపడుతుంది మరియు అధిక సాంద్రత కలిగిన లిపోప్రొటీన్ (మంచి కొలెస్ట్రాల్) స్థాయిలను పెంచుతుంది. జీలకర్ర మరియు పెరుగు వినియోగంపై జరిపిన మరొక అధ్యయనం ఇదే ఫలితాలను సూచించింది.

అదనంగా, జీరా నీరు యాంటీ ప్లేట్‌లెట్ అగ్రిగేషన్ ప్రభావాన్ని (anti-platelet aggregation effect) కలిగి ఉన్నట్లు కనుగొనబడింది. ప్లేట్‌లెట్ అగ్రిగేషన్ రక్తం అధికంగా గడ్డకట్టడానికి బాధ్యత వహిస్తుంది, ఇది అథెరోస్క్లెరోసిస్ మరియు ఇతర గుండె రుగ్మతల యొక్క సమస్యల లక్షణాలకు దారితీస్తుంది. కాబట్టి, జీలకర్ర నీరు ఖచ్చితంగా కార్డియోప్రొటెక్టివ్ ప్రభావాలను కలిగి ఉందని నిర్ధారించవచ్చు.

జీలకర్ర నీటిలో యాంటీఆక్సిడెంట్లు పుష్కలంగా ఉంటాయి. శరీరంపై యాంటీఆక్సిడెంట్లు వాటి చర్యల ద్వారా రోగనిరోధక శక్తి పనితీరును మెరుగుపరచడంలో సహాయపడతాయి. ఇటీవలి అధ్యయనం ప్రకారం, జీలకర్ర మరియు సీమసోంపు (షాహి జీరా) విత్తనాల నీటి సారం గణనీయమైన యాంటీమైక్రోబయాల్ ప్రభావాన్ని కలిగి ఉంటుంది అని తెలిసింది. అంటే జీలకర్ర వ్యాధి కలిగించే సూక్ష్మజీవులపై వ్యతిరేకంగా ప్రభావవంతంగా పనిచేస్తుంది. ఇది వివిధ రకాల బ్యాక్టీరియాకు వ్యతిరేకంగా ఉంటుంది.

జీలకర్ర నీరు క్లేబ్సియేల్లా న్యుమోనియా (Klebsiella pneumoniae) యొక్క పెరుగుదలను నిరోధించడంలో సహాయపడుతుంది, అది న్యుమోనియా మరియు కొన్ని రక్తప్రవాహ సంక్రమణలకు (bloodstream infections) కారణమవుతుంది. జీలకర్ర నీరు అలెర్జీ నిరోధక ప్రభావాలను కలిగి ఉందని మరొక అధ్యయనం నివేదించింది. ఈ పరిశోధనలన్నీ జీలకర్ర నీరు అంటువ్యాధులు మరియు అలెర్జీలను నివారించడం ద్వారా రోగనిరోధక శక్తిని మెరుగుపరుస్తుందని నిర్ధారించడానికి సహాయపడతాయి.

మన నోటి క్యావిటీలో అనేక సూక్ష్మజీవులు ఉంటాయి, ఇవి సాధారణ స్థితిలో వ్యాధులను కలిగించవు. వ్యక్తికీ ఇతర వ్యాధులు ఉన్నపుడు రోగనిరోధక శక్తి కొద్దిగా తగ్గినప్పుడు ఈ సూక్ష్మజీవులు అధికమొత్తంలో పెరుగుతాయి. నోటి క్యావిటీలో 700 కి పైగా జాతుల బ్యాక్టీరియా ఉన్నట్లు కనుగొనబడింది. అత్యంత సాధారణ నోటి సమస్య దంత క్షయం, దీనిని జీలకర్ర నీటి సహాయంతో నిర్వహించవచ్చు.

జీలకర్ర మరియు సీమసోంపు గింజల యొక్క నీళ్లు స్ట్రెప్టోకోకస్ ముటాన్స్ (Streptococcus mutans) మరియు స్ట్రెప్టోకోకస్ పైజెన్స్ (Streptococcus pyogens) యొక్క బయోఫిల్మ్ ఏర్పడకుండా నిరోధించడంలో సహాయపడతాయని పరిశోధన ఆధారాలు సూచించాయి. స్ట్రెప్టోకోకస్ ముటాన్స్ దంత క్షయాలకు కారణమవుతుంది, ఇది దంతాల నిర్మాణం యొక్క నష్టం ద్వారా వ్యక్తమవుతుంది.

డీమినరలైజేషన్ ప్రక్రియ ప్రారంభమయ్యే ముందు స్ట్రెప్టోకోకస్ ముటాన్స్ మరియు ఇతర వ్యాధికారక జీవులతో కూడిన బయోఫిల్మ్ ఏర్పడటంతో దంత క్షయాలు ప్రారంభమవుతాయి. కాబట్టి, బయోఫిల్మ్ యొక్క సంశ్లేషణను (synthesis) నివారించడం ద్వారా, జీలకర్ర యాంటీ-కేరీస్ (anti-caries) ప్రభావాన్ని కలిగి ఉంటుంది.

స్ట్రెప్టోకోకస్ పైజెన్స్ పళ్ళ మీద దంత క్షయం కంటే అధిక ఘోరమైన చర్యను చూపిస్తుంది. దీని వలన కలిగే ఇన్ఫెక్షన్ సెప్సిస్ మరియు సెల్యులైటిస్‌కు వంటి వాటికీ దారితీయవచ్చు, అది ప్రాణాంతకం కావచ్చు. ప్రతి రోజు ఒక గ్లాసు జీలకర్ర నీరు ఈ సమస్యల నుండి మిమ్మల్ని దూరంగా ఉంచుతుంది.